!...
تانيماديغيم آداملار. سايلاري بللي اولمايان آداملار ايکي بؤيوک دسته يه آيريلميشلار. هر ايکي دسته يه منمي يول گؤسترمه لييم؟! قالاباليق اوزومه باخير. ايچلرينده بيري حدديندن آرتيق اوزون بويلودور. بير دسته درين بير دره يه دوغرو يوللانير، ايکينجي دسته ده باشیندا بير آز قار گؤرونن زيروه يه دوغرو ديرماشيرلار. بولوندوغوموز يئر کنديميزه ياخيندير. آنجاق نه بو دره، نه ده بو زيروه من بو کندده بؤيودويوم زامان يوخ ايدي! هاردان چيخدي بو زيروه ايله بو دره؟ کنديميزين اؤروشلرينده بئله شئيلر اسکيدن يوخ ايدي! پريشان دورومدا اولان آداملار ندنسه مني سوچلاييرلار! آنجاق بو قدر اينسان توپلولوغونون ايچينده تانيياجاغيم بير تک آدام دا يوخدور. هم دره ده کي لردن، هم ده زيروه يه ديرماشانلاردان چوخ اوزاقلاشميشام. ايچيمدن بير سس اونلارين هاميسي نين ايشلري نين بيتديگيني سؤيله يير. بو قالاباليغين دره يه و زيروه يه ندن گئتديکلريني بيلمه ديم. کنديميزين گوندوغان طرفيندن باخيرام: «آه، اورا بيزيم کنديميزدير.» — دئيه اؤز-اؤزومه پيچيلداييرام. چوخ اوزاقدا اولسام دا کنديميز و ائويميز سيرلي بيچيمده گؤرونور. ايچيم سئوينجله دولموش. کنديميزه طرف يورويورم اوت يوکو داشييان ايکي اؤکوزله. اؤکوزلرين آرخاسينداکي تاختا آرابالارا اوت يوکلنميش. اسکيدن اؤروشلردن، تارلالاردان بؤيله داشييارديق اوت يوکونو. بير باشقا آدام دا ايکي اؤکوزله اوت داشييير کنده. آنجاق من بو آدامي تانيميرام. «سن ده بيزيم کندليسنمي؟» — دئيه سورورام. آدام «هه، بير کنددنيک» — دئيير.
— او زامان من سني نييه تانيميرام؟
— من سندن مين ايل اؤنجه بو کندده ياشاميشام، بلکه او اوزدن تانيميرسان، خاطيرلاميرسان. آدامين بو سؤزلرينه شاشيرميرام ندنسه. سؤيله ديکلري منه طبيعي گؤرونور. دئديکلريني قبول ائديرم. يقين مين ايل مندن اؤنجه بو کندده ياشاميشدير. آنجاق «سن چوخ گنج گؤرونورسن. سنين حاققيندا کندين آداملاريندان هئچ بير شئي دويماميشديم.» — دئيه سورورام. آدام «کنديميز بير بولاغين اطرافيندادير. تپه نين باشينداکي بولاغين چئوره سينده دير کنديميز.» — دئيير. گؤرورم کي، تانيماديغيم آدام دوغرو سؤيله يير. اؤکوزلري نين يئريشينه باخاراق داوام ائدير: «او زامان بولاغين سويو بيردن — بيره قورودو. چوخ آدام ايستمه دن کندي ترک ائتمک زوروندا قالدي. من ترک ائتميشديم کندي. بلکه بونا گؤره اينسانلار اونوتموشلار منيم حاقيمدا دانيشماغي. آنجاق منیم بير سورو خاطيره لريم وار بو کندده. هئچ بير زامان روحوم کنديميزي ترک ائتمه دي. ترک ائتمه ديگي اوچون ايندي گئري دؤنموشم.» قيوريم ساچلي، الينده بير سوپا اولان آدام بوندان آرتيق دانيشمير. کنده چاتماغا آز قالميش. تپه نين اتکلريندن اوزويوخاري اؤکوزلرين آرخاسينجا يورويوروک. يالنيز خاطيرلايا بيلميرم کي، نئچه ايلدن سونرادير منيم کنديميزه دؤنوشوم. تانيماديغيم آدام اؤکوزونون آرخاسينجا باشقا بير ائوه طرف گئدير. حَيَطيميزه چاتميشام. گون باتميش، آلاتوراندير. حَيَطيميزده کيمسه يوخدور. ائويميز بوش گؤرونور. آرخاسيندا اوت يوکو اولان اؤکوزلرين هارا گئتديگيني بيلمه ديم. «ندن ائويميزده کيمسه يوخدور؟!» — دئيه ايچيمه واهيمه دولماغا باشلايير. ديقتله تکرار ائويميزه باخيرام و «هه، بورا بيزيم ائودير. باخ او ديوارداکي دليکلردن گئجه لر سرچه توتارديم.» — دئيه اؤز-اؤزومه دوشونورم. آنجاق ائويميز داها اسکي ائوه دؤنوشور بيردن. من 10 ياشيمدا ايکن ائويميز بئله ايدي. آنجاق داها سونرا بو ائوي سؤکوب يئرينده يئني ائو تيکميشديک. نئجه اولموش دا يئني ائويميز يوخ اولموش، يئرينده اسکي ائو يئنيدن گؤرونور؟! ائويميزين اؤنونده کي خيرماندا ديزلريمي قوجاقلاييب فيکره داليرام. اوشه نيرم. ايچيمي قورخو بوروموش. هاوا آلاقارانليق اولموش آرتيق. آنجاق هئچ بير سس- سمير يوخدور. سانکي بير اوشوتمه ايچيمده حرکت ائتمه يه باشلايير. اومودسوزلوق ايچيمه سيزماغا باشلاميش. تام بو سيرادا چيينيمه بير ال توخونور. باشيمي ديزلريمين آراسيندان قالديريب باخيرام. آنامدير! درحال آنامين بوينونا ساريليرام، گولر اوزلو آنامين. آنام دا منيم بوينوما ساريليب، اوزومدن اؤپه رک «خوش گلدين، اوغلوم.» — دئيير. ديقتله و حئيرتله آناما باخيرام. آنامين اوزونده بو قدر ايشيق داها اؤنجه هئچ گؤرمه ميشديم. آناملا بير يئرده ائويميزه گيريريک. ائويميزين ديشي اسکي، ايچي ايسه، يئني تيکديگيميز کيميدير. شاشقينليغيمي گيزله ده بيلميرم. دهليزده کي اوجاغيميز سؤنموش، اوجاغين بوشلوغونو دا دولدوروب سوواميشلار. هم ده اوجاغين سوواقلاري هله قوروماميش. مطبخه گيرمکده اولان آنامدان «آنا، بو اوجاغي نييه سؤندوردونوز؟ بوتون عايله بو اوجاغين اطرافيندا اوتوروب يئمک يئيه رديک، چاي ايچرديک.» — سورورام. آنام موعمالي باخيشلاري ايله «آتان بئله مصلحت بيلدي. دئدي بوندان سونرا مطبخده اوتوراليم.» — دئدي.
— مطبخده؟ مطبخ تهلوکه لي دئييلمي ايدي؟ هر زامان مطبخين ديواري نين اوچماسيندان قورخارديق. نئجه اولدو مطبخده اوتورماق قرارينا گلدينيز؟
— اوغلوم، او ديواري اؤزوم تکباشيما سؤکوب يئنيدن هؤردوم. گل باخ ايسترسن.
مطبخه کئچيريک. گئرچکدن هر زامان اوچماسيندان قورخدوغوموز ديواري آنام يئنيدن هؤرموشدو. آرتيق بو ديوار داياناقلي گؤرونوردو. اوچمازدي. مطبخده کي اوجاقدا کؤزون اوستونده قارا قازاندا يئمک بيشيردي. يئمه یين دادلي قوخوسو بورنوما دولور. آنامدان سوروشورام: آتام هاردادير؟
— آتان گئتدي قونشو کنده. باجين خسته لنميش. اونا اوغراماغا، حاليني سورماغا گئتدي.
— آنا، آتام اؤلمه ميشدي؟ آتامين دفن مراسيمينه اؤزوم ده قاتيلميشديم. يوخسا من يوخومدا آتامين اؤلدويونو گؤرموشم؟!
آنام نه سه دئمک ايسته ييردي کي، مطبخه بير قيز گيريب بوينوما ساريليب مني اؤپمه يه باشلادي و «گؤزل قارداشيم، خوش گلدين.» — دئدي. آنام دئمک ايسته ديگي سؤزو دييشديريب و «بو دا سنين ان بؤيوک باجيندير. باجين دا گلدي.» — دئدي.
تانيماديغيم قيز هله ده بوينوما ساريليدي. اوزومو آناما توتوب حئيرتله سوروشورام: بو منيم باجيمدير؟ من بونو هئچ واخت گؤرمه ميشديم.
آنامين اوزونه کدر قونور و «سن منيم 8- جي بالامسان. بو دا بيرينجي بالامدير. منيم ايلکيم قيز ايدي. سن دونيايا گلنده باجي نين 15 ياشي وار ايدي. سن دوغولدوقدان بير ايل سونرا اؤلدو. بآجين قيزيلجايا ياخالانيب اؤلموشدو. او سني تانييير. بير ايل قوجاغيندا گزديرميشدي سني. بله ميشدي. آنجاق سن اونو خاطيرلامازسان. او اؤلدويونده سن خاطيرلاياجاق ياشدا دئييلدين.» — دئيير. باجيمين گؤزلرينده درين بير کدر گؤرورم. حصرتله منه باخير. اگنينده قيرميزي بير کؤينک. آنام «باجين اؤلدويونده اگينينده بو پالتار وار ايدي.» — دئيير. بيردن باجيم «قارداش قوي سينه نه باخيم سنين. او زامان سينه نده بير خال وار ايدي. ساغ مه مه نين اوستونده بير خال وار ايدي. سني بله ديگيمده گؤرَرديم. او خالدان اؤپدويومده سنين قيديغين گلردي، گولردين.» — دئيير. ياخامي آچيب سينه مه باخير. ساغ اليني ساغ مه مه مين اوستونه سورور. گؤزلريندن ياش آخماغا باشلايير و «خال يوخ اولموش!» — دئيير. باشينداکي ساري اؤرتوسو ايله گؤز ياشلاريني سيليب آغلايير. آنام «آغلاما قيزيم، اوشاقلار بؤيودوکلرينده بدنلرينده کي بعضي خاللار يوخ اولار. نييه آغلاييرسان؟» — دئيير. باجيم آغلايا-آغلايا «آمما من او خالي چوخ سئويرديم.» — دئيير. باجيمين بوينونا ساريليب «لوطفا آغلاما، من ياخشييام، سن ده ياخشي اول! منيم ساغليغيم يئرينده دير.» — دئمک ايسته ييرم. نه قدر چاليشسام دا اونا توخونا بيلميرم. تام اؤنومده دورسا دا بير تورلو اونا توخونا بيلميرم. منيم اونا توخونما چابالاييشيمي باجيم گؤرمور سانکي. منه يارديم ائتمير. آنام منيم حرکتلريمي گؤروب «اوغلوم سن اونا توخونا بيلمزسن. او سنه توخونا بيلر. او بير روحدور. اؤلولره توخونماق اولمور. آنجاق اونلار توخونا بيليرلر.» — دئيير. سونرا دا آنام اوزونو باجيما توتوب «قيزيم گئت حَيَطده نئهره ني چالخالا.» — دئيير. باجيم آغلار گؤزو ايله حَيَطه چيخير.
اوجاقدا بيشمکده اولان يئمه یين قوخوسو چوخ فرقلي گلير منه. «آنا، قارنيم آجيقميش. منه بير آز يئمک وئر.» — دئييرم. آنام قازانين آغزيني آچيب چؤمچه ايله کاسايا يئمک چکمک ايسته يير. قازانين ايچينه باخيرام. بوم- بوشدور. «آنا، بو قازان کي، بوشدور. بوش قازاني اوجاغا نييه قويموسان؟ يئمک قوخوسو هاردان گلير؟» — دئييرم. آنام «يوخ، بوش دئييل. سن قازانداکيني گؤرمورسن. ايندي کاسادا گؤره جکسن. صبر ائله سنه يئمک چکيم.» — دئيير. گئرچکدن آنام کاسايا قيزارديلميش شومون دولدورور. بو شومون بيزيم کندين تارلالاريندا، اؤروشلرينده بيتمزدي. قونشو کندين اؤروشلريندن گئديب ييغارديق. آناملا هر ايل يازين اورتاسيندا کندين قيزلارينا، قادينلارينا قاتيليب گئديب شومون ييغارديق. شومونو ياخشي قايناديب سويوداردي آنام. سونرا دا اللري ايله شومونون سويونو مؤحکم سيخاردي. سيخيلميش شومونو ياغدا سوغانلا بير يئرده قيزارداردي. چوخ دادلي بير يئمک اولاردي. دادي بير باشقا اولاردي. ايندي ياواش- ياواش شومونون قوخوسونو خاطيرلاييرام. او دادلي قوخودور. اسکيدن اولدوغو کيمي شومونو لاواشين آراسيندا دورومَج ائديب يئمه يه باشلاييرام. آناما «بو دفعه منسيزمي گئتميشدين شومون ييغماغا؟» - دئييرم. آنا ايسه «يوخ، اوغلوم. سن گئدندن سونرا قول- قاناديم قيريلدي سانکي. هئچ بير يئره چيخا بيلمه ديم. آنجاق ائوده، حَيَطده دولاشا بيلديم. بو شومونو بير يئرده ييغميشديق. خاطيرلاييرسانمي؟ سون کره بير يئرده کندين قادينلاري ايله گئتميشديک. او زامان سنين 14 ياشين وار ايدي. او زامان ييغديغيميز شوموندور. هاميسيني بيشيرمه ميشديم. ساخلاميشديم بير قيسميني. آنالار ائولادلاري اوچون دايما بير شئي ساخلارلار. من ده سنين اوچون شومون ساخلاديم.» — دئيير.
— انجاق او واختدان بري چوخ زامان کئچميش آنا.
— هه، بيليرم. چوخ زامان کئچميش. زامانين فرقلي طرفلري وارميش دئمک. بونو منه آتان آنلاتدي. آتان دئيير کي، اينسان يالنيز اؤلدوکدن سونرا بونو آنلايا بيلير. اؤلمه دن بونو آنلاماق اولماز. اؤلدوکدن سونرا باشقا بير زامان باشلايير. آتان دئيير کي، بو زامان آنلاييشيني بيز اؤلمه دن اؤنجه آنلاشيلماز و گيزملي شکيلده ايچيميزده داشيييريق. آنجاق هئچ بير شکيلده اونو ياشايا بيلميريک. او زامانين ايچينده اؤزوموزو گؤره بيلميريک. ايچيميزده گيزلين اولاراق مؤوجود اولان بو «زامان» باشلانقيجسيز و سونسوزموش. اؤلدويوموزده ايچيميزده کي بو زامان فعاللاشيرميش. باخ اوغلوم، من بو شومونو او زامان اؤلچولري ايله سنين اوچون ساخلاديم. اؤيرَنديگيم بير زامان آنلاييشي اولدو. او ايمکاندان يارارلانيب سنين اوچون، سئويملي اوغلوم اوچون بير شئي ساخلاماغی دوشوندوم.
آنامين بو دادلي و سيرلي يئمه گيندن يئديکجه ايچيم راحاتلايير. من يئمکدن ذؤوق آلديقجا آنام دا منه باخير. اوزونده کي گولوجوکلر موتلو اولدوغونو گؤسترير. من راحاتلاديقجا آنامين اوزنده کي موتلولوق گولوجوکلري ايشيغا دؤنوشور سانکي.
يئمک يئييب ديشاري چيخيرام. باجيم حَيَطده يوخدور، گؤرونمور. کندين مئيدانينا گئديرم. اوشاقليقدا تاي- توشلاريملا بوردا گئجه لر، ياز گئجه لرينده گيزلينپاچ اوينارديق. مئيدان بوشدور. تاي-توشلاريمدان هئچ کيمسه يوخ. ايچيمده آجي آغريلار دالغالانير. هر کس گئتميش. هارا گئتميشلر؟ کندين پالچيق ائولري نين کيچيک باجالاريندان اسکيدن گؤردويوم ايشيقلار آرتيق گلمير. ائولرين ايچي قارانليق. يالنيز گؤيده اولدوزلار پاريلداشيرلار. گؤيده کي اولدوزلار اسکيدن اولدوغو کيمي يئرلرينده لر...
14.04.2010
